الدرر المنظومة مية بيت مع تسجيل صوتي

[مشبب عبدالله القحطاني]

بسم الله الرحمن الرحيم

السلام عليكم ورحمة الله وبركاته

اللهم لاسهل إلا ماجعلته سهلا وأنت تجعل الحزن إذا شئت سهلا

لك الحمد ولك الشكر على جزيل نعمك وأكبر نعمة أنعمت بها علينا نعمت الإسلام فلك الحمد حمدا ً حمدا ولك الشكر شكرا ً شكرا

أحبتي الكرام إيمانا ً مني بأن الشعر رسالة فإن شاء الله لن أكتب في شعري إلا مافيه الخير لنفسي ولغيري وأسأل الله أن ينفع بما كتبت

هذه القصيدة جديدة فأحببت نشرها لعل الله ينفع بها

القصيدة اسميتها الدرر المنظومة عبارة عن نصائح وحكم حاولت جمعها في قصيدة وحاولت قدر المستطاع أن تكون منوعة وشاملة لعل الله ينفع بها

القصيدة 100 بيت على البحر الصخري النبطي مفاعيلن مفاعين فعولن ... مفاعيلن مفاعيلن فعولن
أو على بحر الهزج العربي مع دخول الحذف في عروضه وضربه بحيث تحول مفاعيلن إلى فعولن رغم أن هذا البحر يكون دائما ً مجزوء ولا يأتي تاما ً إلا ماندر وتفعيلاته الأساسية هي تفعيلات البحر الصخري مع دخول الحذف في عروضه وضربه

القصيدة سجلتها بالصوت بلحنين بدأتها باللحن الأساسي ولكن لو أكملتها على نفس اللحن فسيأخذ التسجيل قرابة النصف ساعة فاخترت لحن آخر بعد عشرة أبيات وأكملت عليه لأنه لحن سريع اختصار لنصف الوقت

كما أتمنى من كان له نقد او ملاحظة أن يدليها لكي أستفيد منها أي ملاحظة أرحب بها وبصاحبها لذلك طرحت القصيدة هنا أولا ً فأخوكم لازال تلميذا ً في الشعر ومبتديء يحاول أن يرتقي بنفسه لكي يوصل رسائله للناس عبر الشعر

لسماع القصيدة



لتحميل القصيدة أضغط هنا


الدرر المنظومة

ألا ياخوي خذ مني وصاتي = أنا بنصحك وأفديك بحياتي
نصايح قلتها من شي شفته = بعمري في السنين الماضياتي
بدنيا حالها حال الشحيحي = بخيل(ن) لو عطا يعطي فتاتي
رضيت بقسمتي والحمد لله = على ماقد كتب واللي بياتي
أخويه ناصحك لو هو مقصر = يبي شوفة دروبك سالماتي
على الله باتكل ناصح وراشد = وأببدا في النصايح بالصَّـلاتي
صلاتك لاتضيعها بعمرك = صلاتك في المساجد حاضراتي
تراها لك مثل نور(ن) يضوّي = ظلام الليل أو في العاتِـمـَاتي
فهي مصدر سعادة وانشراح(ن) = سعادة طفل لعب وتسلياتي
أبوك أمك رضاهم لاتفوته = إذا نادوك جاوب في ثباتي
بخدمتهم ترى مالك جماله = طوال العمر ماعنهم غناتي
إذا كبرو فعاملهم برفق(ن) = كَمَا مولود في عزّ ورهاتي
أطعهم لاتأفف في أجابه = ولاتنهرهما فعل و جزاتي
ورحمك لاتقاطعهم وصِلهُم = إذا جافوك قابل بالصِّـلاتي
ترى في عزّ والينا استجارت = وربي جارها وصل وجفاتي
أجار الرحم رحمة من وصلها = ومن يقطع بسوء العاقباتي
وجارك جاوره في حسن جيره = مثل جيرة خوان(ن) أو خواتي
إذا يحتاج تعطي من حلالك = وإذا قصّر تغطّي القاصراتي
وحاول تاصله فتره وفتره = ولاتقطع حبال مواصلاتي
فجبريل الملك وصّى نبيه = بحق الجار حسن التوصياتي
وصاحب لاتِصَاحب غير خيّر = صديق(ن) يحفظك في النايباتي
صديق(ن) لو يشوفك في مزلـّه = يوجّه ينصحك للعالياتي
وإذا اشتدّت شدايد في حياتك = وقف وقفة شجاع المعركاتي
فهو يقدم ولا يبطي بخدمه = ولو يفديك بأغلى الغالياتي
وجنـّب كلّ فاسد في حياتك = وصاحب صحبته للمصلحاتي
إذا تحتاج له عنك تخبّى = وإذا يحتاج لك يسعى وياتي
فحاله كالزجاجه بعد كسر(ن) = يترمى أو ليدّك جارحاتي
وشلة سوء منها لاتقرب = ترى تعديك تصبح في شتاتي
فإذا جالست قوم(ن) في مجالس = لسانك تحفظه من عاثراتي
فلا تغتاب رجل(ن) في مغيبه = ولاتنطق بقول الباهِتَاتي
ترى الغيبه حرام بشرع ربي = كلحم(ن) تاكله بعد المماتي
ولاتذكر عيوب أشخاص غيرك = ونفسك للخطايا سالكاتي
فغيرك له عيون(ن) في عيوبك = بيذكرها لغيرك كاملاتي
ولاتسعى بفتنه بين قوم(ن) = تشب النار تجلب كارثاتي
ترى النمّام موعود(ن) بنار(ن) = حطبها من عظامه واقداتي
فلا تسمع لواشي في حياتك = ترى يهدم بيوت(ن) عامراتي
وإذا جادلت قوم(ن) في جدال(ن) = فجادل لك رجال(ن) عارفاتي
تفيد وتستفيد أشياء وأشياء = وتكسب لك علوم ومعرفاتي
وإذا جادلت لك جاهل فجنب = جداله والتزم صمت الدُهَاتي
جداله يكسبك حسره وندامه = كلام(ن) فاضي(ن) ومهاتراتي
لأنك لو تعيش العمر كله = تبي تثبت أمور(ن) حاصلاتي
محال(ن) يقتنع مهما تحاول = لأن الجهل شر المعضلاتي
فكن في مجلسك قدوه وحكمه = ولاتنطق بقول التافهاتي
وأعراض النسا ابعد وحاذر = تجنـّب ذكرها بالسيئاتي
ترى عرض النسا حرمه عظيمه = كأرض(ن) للعدو وملغماتي
عدو(ن) يذبحك أو لغم يقتل = فلاترمي بقذف المحصناتي
إذا حذرت منها في كلام(ن) = فما بالك زنا أو فاحشاتي
فلاتقرب مواطن للرذيله = ولاتسعى للـُـقـيـَا العارياتي
أَبـِي تعرف بأن العرضَ دين(ن) = وفاها من خوات(ن) أو بناتي
فلا تزعج بنات الناس لحظه = وتسعى للغزل بمجمعاتي
ولاتغري فتاة(ن) باسم حبك = وليلك تسهره بمعاكساتي
تكون الفارس بعزّ القضية = دلع حب وغزل ومكالماتي
وإذا طاحت فتاة(ن) في شباكك = تودعها بوسم الغانياتي
طلبتك مثل هذي لاتجيها = نخاف من الجزا والقاضياتي
ودرب الغانمين اسلك طريقه = تعيش بعز في درب النجاتي
اطع ربك وصل الفرض واحرم = لحج البيت مع دفع الزكاتي
وشهر الخير في عمرك تصومه = ركون الدين دايم ثابتاتي
وفي يومك سنن لو هي تأدي = تكمّل لك قصور وناقصاتي
بثنتي عشر ركعاة(ن) تصلي = بيومك مع فروضك وافياتي
إذا صليتها مداوم عليها = فلك بيت بجنان(ن) خالداتي
وباخر ليل للخالق سجودك = ودمعاة(ن) لفعلك شاهداتي
تناجي خالقك رافع ليدك = بدعواة(ن) لربك خاشعاتي
وللمصحف توضّا ثم تقرا = بصوت(ن) خاشع(ن) فيه العظاتي
كتاب(ن) فيه راحه فيه تقوى = تمسك به تفوز بطيباتي
ولاتسمع لمزمار(ن) وعود(ن) = بها حسرة وضيقة دايماتي
وإذا تبغى تزيل الضيق عنك = فذكر الله يزيل الضايقاتي
ووقتك تشغله باللي يفيدك = ولاتجعل سنينك ضايعاتي
ترى عمر الفتى محسوب كله = فلايضيع العمر في لاهياتي
تعلم واشتغل وانتج وقدم = ولاترمي الدهر باللايماتي
وإذا واجهت لك أمر(ن) صعيب(ن) = فلاتيأس تصيبك واهِنـَاتي
وخلك ذو عزيمات(ن) شديده = تشوف الصعب مثل الساهلاتي
وبالتكرار تنحلِّ المصاعب = فكثر الدق يفك اللاحماتي
وإذا تحتار بامر(ن) من أمورك = فشاور لك هل الراي الثقاتي
ولاتنسى تصلي استخاره = فربك يرشدك بالنيـّراتي
ينور لك طريق(ن) فيه خير(ن) = ويصرف عنك شرِّ الهالكاتي
وخالط من تخالط في حياتك = بطيب أخلاق وحسن معاشراتي
وخلك مبتسم للي تشوفه = تواضع ترتفع من دانياتي
بحسن القول خاطب من تخاطب = وطيب الفعل يحلّ المشكلاتي
فإذا ناصحت ناصح في محبه = ولاتغلظ بنصحك للعصاتي
ترى الشدّه تِـبَـعِّـد ماتـِـَقـرِّب = بقول(ن) في كتاب وبيناتي
وإذا ودك تعدل شخص ثاني = فنفسك دلها للصالحاتي
فإذا زانت حوالك فالبداية = بأهلك ثم حولك من صِلاتي
ولاتبدا بغيرك من بعيد(ن) = وأهلك في الخطايا غامساتي
فمثلك مثل من يهدي طعامه = وبنتينه طوايا جايعاتي
فدل النفس وأهلك ثم غيرك = وخلك نافع(ن) طول الحياتي
ترى عمر الفتى وإن طال يقصر = مصيره للقبور الموحشاتي
فزادك هو صلاة وحسن تقوى = فهي نور القبور المظلماتي
ودعواتك لربك هو رحيم(ن) = وتوبه صادقه قبل الوفاتي
عسى ربي لنا يعفو ويرحم = ويغفر ماحصل في الماضياتي
فهذي لك نصايح في قصيده = بحرها كالصّخور القاسياتي
فلك غصت البحور وجبت در(ن) = لعينك صغتها بمجوهراتي
ومن جني الثمار أحلى قطوفه = قطفت من الثمار الناضجاتي
وأهديتك من الورد الطبيعي = ورود(ن) يانعه وملوّنـَاتي
على خيل(ن) عريبات(ن) أصيله = أسوق من الكنوز النادراتي
هدايا سقتها باسم الأخوه = لمن يقرا ويسمع قافياتي
فمن يقبل هديه من هدايا = فيدعيلي بحسن الخاتماتي
عسى ربي تِـقـَبـَّـلها وينفع = بها منهو خذا بالتوصياتي
مية بيت(ن) فريدات(ن) جزيله = درر منظومة(ن) ومزخرفاتي
بفضل(ن) من إلهي هو معيني = نظمت القاف واتممت الوصاتي
وخير ختامها ياربّ صَلـِّي = على محمد رسول المعجزاتي

كلمات أخوكم مشبب القحطاني أسير الصمت


تقبلوا تقديري واحترامي وانتظر نقدكم الذي يشرفني من أي شخص كان فمنكم نتعلم ونستفيد كما أتمنى أن تحوز أبياتي على رضاكم

[محمد عبدالله البدراني]

العزيز الفاضل اخي مشبب القحطاني سلمه الله


درررررررررررررر فعلا

اسجل مرروري وانا مستمتعا بسماع هذه الدره


لله دررررررررررررررررك

ومليوووون صح السانك


وجعلها الله في ميزان حسناتك


ولي عوده ان شاءالله بعد ان استكمل هالدره سماعا ً


تحيتي
مع اسمى ايات الشكر فائق التقدير واطيب المنى رعاك الاله

[الطائر المهاجر]

سلمت وصح لسانك وفكرك يامشبب
جزلة من راس جزل
حقيقة انت متمكن من التقطيع
ومن تمكن منه فلاخوف عليه من الوزن
لاهان راسك
تحياتي الطيبة

القحطاني

صح صح صح لساانك
شاعر متمكن اجاد طرح منظومته من الدرر
ابدااع بالالقاااء
استمتعنا بالنص سماعا وقراءه

بحق تستحق هذه القصيد
ان تكون مرجع لمكارم الاخلاق

لله دررررررررررررررررك

ولا هنت
موج القصيد

[مبروك بن ماضي]

شاعرنا القدير/ مشبب القحطاني
صح لسانك وعلا شانك
قصيده عانقت السحاب بروعتها
وما حوت من درر ناصحة . .
دمت بهذا الحضور وهذه الشاعريه.
تقبل فائق التقدير والاحترام

[داعي الشوق]

صح لسانك يالشاعر القحطاني

قصيده رائعه

فيها من الحكم الشيءالكثير

جميل ما كتبت

صح لسانك مع التحية لك
دمت بخير

،،،،،،،،،،،،،،،

[نجم الإبداع]

صح لسانك يامشبب

دره


لاهنت


تقبل مروري

وتقديري

[زهرة اللوتس]

الشاعر // مشبب القحطاني
سلمت وسلم منطوقك
جزلة من شاعر جزل
لافض فوك ولله درك
لك مني
اطيب المنى

زهره

[عبدالعزيز العمار]

الشاعر القدير مشبب القحطاني ..

صح لسانك وجاد بيانك ..

فعلا درر من شاعر متمكن وقدير ..

استمتعت بقرائتها ولك جزيل الشكر والعرفان..

تقبل اجمل تحياتي ..

[الخنساء]

صح لسانك ولاهنت

ابيات رائعة

ترجمت الحكمة

سلمت ودمت بخير