كشكول ذيب السنافي

يانــــــاس ياهوووه ياعرب

اليوم بعد صلاة الظهر أتصلت الوالدة علي وسلمت علي وكان صوتي فيه بحة من أثر البرد خلوني أخش في المحادثة :

أمي : السلام عليكم

ذيب : وعليكم السلام هلا وغلا والله بها الطلة هلا بسيدي وتاج راسي هلا بأم ذيب

أمي : آآه منك يالوقي

ذيب : يسلمك ربي

أمي عسى ماشر يمه وش في صوتك

ذيب : مافيني شيء أزقح

أمي : لا يوليدي وش فيك وش بلى صوتك قبل أمس ماكلمت مافيك شيء صاير لك شيء يايمه

ذيب : لا يمه والله مافيني أطمأني وريحي بالك الأمور كلها تمام

أمي : لا فيك شيء
(أخوي ذا الثور معلمها أني خابطتني أنفلونزا وماعلمتني أنه معلمها خايفه أني أضيق عليه)

ذيب : والله العظيم الحين مافيني شيء

أمي : وليدي (خنقتها العبرة) تخبي علي وأنا أمك

ذيب : لا يمه بس أنا عارف ذا الثور معلمتس الله يهديه شيء بسيط وراح الحين كلو تمام تيقه

أمي : تبكي (جعل والدينا في الجنة ,, والله أنها تحس بأي شيء يصير لي سبحان الي عطى الأمهات الأحساس)

ذيب : لبى قليبتس يمه تبكين لا تبكين يمه كان تغليني تكفين لا تبكين (خنقتني العبرة يوم سمعتها تبكي تذكرت كل شيء,, تحسفت على أي يوم فيها أنا بعيد عنها )

أمي : أوعدني وأنا أمك تتغطى وتتلحف وتنتبه لنفسك جعل ربي يفرحني فيكم أنت وأخوانك ناجحين ومتوفقين ومتزوجين

ذيب : الله يسمع منتس آمين يارب العالمين ,, لا تهتمين يمه أن شاء أرفع راستس أنا وأخواني وراس أبوي بعد

أمي : اللهم آمين يايمه جعل ربي يحفظكم من عيال الحرام ومن الحساد والعذال جعلكم تبرون في كل من يوذيكم

جعل يومي قبل يومكم وجعلكم ماتشوفون شر قدر ياكريم

ذيب : لا أن شاء الله جعلي أنا ما أذوق يومتس يايمه ,, ياله يمه طولتس عليتس في الجوال ماودي أخسرك

أمي : في حفظ الله ياوليدي أنتبه لنفسك ولوخيك وأنتبه للصلاة مع الجماعة في المسجد يايمه من يحفظ الله في الرخاء يحفظه الله في الشدة يايمه خلاص وأنا أمك

ذيب : أبشري يايمه أن شاء الله ماتشوفين ألا الي يرضيتس

أمي : في ستر الله مع السلامة

ذيب : مع السلامة
------------------

أوردت المكالمة هنا في المذكرات ليه

لأني أبيكم تشوفون كيف الأم قلبها كبير كل واحد منا ينسى مع زحمة الدنيا أن فيه أم وأب ينتظرونه يبون يرفعون روسهم فيه يبون منه بس مصلحة نفسه ولا شيء أكثر وبيعطونه وبيرضونه

والله يا أخوان يابكت الوالدة تقطع قليبي عليها تمنيت أني عندها أمسح ذيك الدمعة العزيزة

تمنيت أقول لا يايمه موب أنتي الي تبكين عدوينك أن شاء الله

يالله ما أروع عواطف الأم وما أجلها وما أعظمها

الله يقدرني على بركم ياوالديني ويجعلني مصدر فخر لكم ويدلني على الطريق الصحيح الي فيه أقدر أرفع روسكم وتدرون أن تعبكم ماضاع,,

ذيب السنافي

[أم ريما]

كلام رااائع في حق من هم اروع ناس في حياتنا وهم الوالدين

حفظهم الله .. وجازاهم بالجنه ... اللهم آمين


يعطيك العافيه اخوي ذيب ...واعانك الله على برهما ... وبالتوفيق

[ابو زياد]

وانت ما اروعك ياذيب
الله يخلي لك والديك
ويقر عيونهم بتوفيقك انت واخوانك

[ثار التميميه]

كشكول في قمة الروعه

ذيب

قصه رائعه من واقع حياتك

شكرا على نقلها لنا

أستاذتي أم فيصل

أستاذي أبوزياد

أستاذتي أم أثال

شكراً لكم على تكرمكم بالمرور وشكراً لكم على الرد

وأشكركم من أعمق أعماق قلبي على الردود اللطيفة

ذيب السنافي

بسم الله الرحمن الرحيم

سأكتب قصة حياتي هنا من البداية إلى يومنا الحاضر بكل فصولها بكل أفراحها وبراءتها ومواقفها ليس لأني أعتقد أنها مهمة أهم من غيري أو لأني أرى نفسي مهم لا

ولكن لكل إنسان قصة مع الحياة تستحق النشر لأنها لابد وأن تكون مليئة بالعبر والدروس

ذيب السنافي

============================== ============================
المراحل الأولى من حياتي أستقيتها من أمي والي حولي ذاك الوقت
============================== ============================
طلعت على الدنيا في بيت محافظ جداً يجمع بين الأصالة والدين والمحافظة على القيم وأفراده بسيطين يعيشون حياة تذكرك بحكايات المشراق وبحكايات الطفولة في نجد وقهوة الضحوية وجلست العجائز مع أزواجهن في ظليل الجدار وتذكرك بعنفوان الرجولة والحمية عند أهل نجد وبالكرم العربي.
============================== ============================
(البداية)

مولد العظماء

في ليلة مافيها ضوء قمر بالتحديد الساعة 1.30 ليلاً يوم 28/8/1401هـ

قومت أمي من نومها وهي أصلاً مستيقظة لم يغط لها جفن قلت يمه بطلع أبي أشوف الدنيا الوالدة كانت حاسة

أني أبي أطلع قومت جدتي قالت ذيب يبي يطلع قالت جدتي حنا له جهزوا كل شيء وبدأ الإستعداد

شوي ألا أنا منور الدنيا وبرق في الغرفة الصغيرة في بيتنا نور وجهي الجميل الوضاء وليني مطفوق وصوتي

عالي وأصارخ وأصيح بس هدهدوني ونوموني(على فكرة الوالدة تقول كانت أصعب ولادة ولادتك وولادت واحد من أخواني فقلت لها : يمه العظيم آلآم ولادته وفقده عظيمه خخخ أمازحها) وأثر أبوي متوقظ بعد هو ينتظرني وفرح بي فرح عظيم لأني :

أول ولد أنور البيت وكني به يغني : (أهلا هلا يامنور الحي والديرة)

صحى جدي هاه بشروا قاله أبوي أبشرك يبه ولد مثل القمر بس كبير حاس أنه بيطلع شنب قاله جدي أن شاء الله

يرفع راسك مثل مارفعت راسي دايم وجعله عبد صالح ويتربى في عزك

المهم جاء الصبح وتسللت أنوار الصباح على جدران ذاك البيت بيت العائلة

وكان بيت العائلة مقابلة الوجه بالوجه بيت خوالي (يعني أن رفعتها ألا في البطن وأن نزلتها الاها في المحزم)

------------------

الصباح الأول لذيب السنافي

تدخل البيت ذاك اليوم شعله من النشاط كان ساكن في بيت العائلة جدي وجدتي وعم واحد وست عمات وأبوي وأمي وأختي أكبر مني وأنا الصغينون الي توني جاي

المهم كلن يبي يشوف خشتي شوي ألا وهاتك ياتبويس وأنا عاد قاعد أعاينهم مدري وش الطبخه صغير وهين عظم وحليوه

ومرة أبكي ومرة مبسوط ومرة محتاس ومرة أبي حليب

المهم من عادتنا أن البنت إذا ولدت = أظنت تروح لأهلها أربعين يوم علشان أمها عندها وتعلمها وتعرفها وتكون أقدر على معرفة حوايجها

المهم ودانا أبوي عند خوالي وهو مبسوط يضحك ومستانس بشوفة خشتي وشايلني على يديه وصلنا لبيت خوالي

وفي طلعتنا كانت تلك المرة الأولى الي أشوف فيها الدنيا والشمس والهواء والطيور في السماء وكنت أقلب عويناتي

دخلنا بيت خوالي ألا والله كل شيء مزهب ولا جدتي وجدي وخذ ياتبريك وياتبويس فيني

جدتي من ناحية أمي : ياحليله ياملحه يالبى قليبه

طبعاً أنا ذايب من الكلام الحلو :d

وشوي حطني أبوي ويبي يطلع وأنا الي أتعنقط في أمي وأجلس معها

شوي ألا الخالات جايات وخذ ياتبويس وأنا مدري وش الطبخة ومبروك ومدري أيش

المهم وشوي ألا ذا البروق الي في وجهي تلمع وشذا البرق مستغرب أنا أثره فلاش الكاميرا هوووى صرت

مشهور وأنا الي أضبط أم الكرفته حقت المهاد علشان التصوير

شوي مدري كم راح من الوقت حوالي الأربع ساعات ألا الوالد جاي وجايب ذيك الذبيحتين وكراتين الدجاج وكيس بر وكيس قهوة وهيل وسكر ورز وأنعام ربي (ترى فينا طخة الأولين تكريم الزوجة وأهلها وتقديرهم )

المهم فرحان أنا مسوي ياخوالي أبوي شوفوه ذيبان تراني بطلع مثله ونافخن عمري ماعاد خذني المهاد

وجلس الوالد مع الوالدة ومعي لحالنا(يقالي مهم وفاهم وش الطبخة) ويجيك ويطلع شلقة ذيك الفلوس الله العالم

بتجي حول الثلاثة الآف ريال وعطاها إياه وقالها إذا بغيتي شيء لا تاخذين من أهلك خذي من الدراهم ذي وأي

شيء تحتاجينه أنتظري لين أجيك وتعلميني به وإذا ضروري ولا تقدرين تنتظرين دقي على البيت (طبعاً يجيها كل

يوم الضحوية وأغلب شيء الظهر أول مايطلع من الدوام)

بعد تقريباً 40 يوم جاء أبوي ذاك اليوم وخذنا لبيتنا الي مقابل بيت خوالي ومن هناك بدت حياة المغامر الكبير

ذيب السنافي
============================== ============================== =====
في الجزء القادم سأقفز بكم مباشرة لما قبل ولادة أخوي طريدي وأصف الحياة قبله وبعد مجيئه

لأنها من هناك تبدأ حياة الشقاوة وبراءة الأطفال وعدم تقدير العواقب

[أم ريما]

ههههههههههههه


على فكرة الوالدة تقول كانت أصعب ولادة ولادتك وولادت واحد من أخواني فقلت لها : يمه العظيم آلآم ولادته وفقده عظيمه خخخ أمازحها)


قصه حلووه ...

تحياتي لك وبأنتظار الجزء القادم

يالله أن تعينا على مذكراتك تبي تشغلنابها ، حنا يالله نلقى وقت لخمس سطور وأنت قاعد تبربس عندنا فيذا بيوم ولادتك يا عظيم ...

أختصر ولا تطول علينا ترانا في شوق للجزء الثاني

بس متى ناصل لجزء المغامرات والبطولات

يالله ننتظر

قل يالله




















قلتها




























ما سمعتك

























إيه ألحين سمعتك
الله يخليلك أمك يارب والنعم فيك وفي برك بها بالكلام الزين اللي قريناه

يحليلك يا ذيب والله أني متحسف في موضوع كتبته عن مذكراتك ، بس يالله تستاهل ..خخخخخخخههههههههه

[ثار التميميه]

ماشاء الله عليك

طفل نبيه