اشهد اني عجزت اكتم غبون الليالي

[فواز الغسلان]

واهـنـي الـخـفـوق اللي من الـهم خـالي=ماقـضـى الليل وفـراق الـحـبايـب يـلـوعه
يافـهــد والـلــه انـي بالـعـرب تـقـل جـالي=يـمـضـي الليـل والـنـومه عـلى راس كوعه
اشهد اني عـجـزت اكتـم غبون الليالي=ولو كـتـمت اصل جرحي بهذلتني فروعه
كيف انادي ولا لي بين الاجواد والي=لاجل يطرد هواجيس الحشى فـي فـزوعه
قبل تقضي حـيـاتـي والزمن ماصفى لي=ولا تراجـي طـريحٍ والـلــهــب في ظـلوعه
ليت قلبي عن دروب الـغـنـاديـر سالي=دام طـبـعــي غـريــبٍ بالـهـوى مع طبوعه
ويش اسوي بريـمٍ هـجـرها سـم حــالي=خـلـت الـروح تـبـعـد عن مجـالس ربوعه
يشتـعـل وسط جـوفـي بالخـلا لاطرا لي=وكـلـمـا زاد يـاسـي يافـهــد فـي رجـوعـه
مالـنـــا فـي قــدر رب الـبــرايـا مـجـالــي=ولا تـرده طــوابـيـــرٍ تـتــــالــى جـمــوعـه
ياحـسافـة عـشـيري في دروب الحلالي=اشـهــد ان الـضـمـايـر فـي فراقه جزوعه
بان جـرح الـضـمـايــر بالوقوت التوالي=والسبايب عـيـونٍ تـفـضـحــه فـي دموعه
وكان طال الـمـفارق مع حسين الدلالي=راح يـرحـل خـفـوقـي يافـهد عن نجوعه
وراح يمسي قريـبٍ من وقوت الزوالي=قبل يشعل يـلـو هـي وحـدةٍ من شموعه
كيف يـزرع عـلـى جال الغدير الزلالي=ونـاتــج الـزرع لـلــي ماتـعــب في زروعه
وكيف يصرف على زرعه من المال غالي=والنـتـايـج زيـادة غـثــــتـــه مــع فـجـوعـه
قـمــت اراقب نـجـومٍ نورهــا بالـعــلالي=وكلما غاب نـجـمٍ قـمــت اراجــي طلوعه
اسهـر اللـيـل كـلـه بـالـمــغـثـه لـحـالـي=ماحصل تـهـتـنـي عـيـنـي بـلــذة هـجـوعـه

[مجدي صالح المبارك]

الشاعر القدير ( فواز الغسلان ) صح لسانك وجاد بيانك على هذه الرائعة التي أتحفتنا وأمتعتنا بها والتي كان لي شرف المرور بين جنباتها , لك مني فائق التقدير ودمت بكل خير .

[الطامي]

فواز
صح السانك ملايين
جزلة ووافيه
وهكذا الفراق له لوعة يالغالي
الله يلم شملك ويفرجها عليك دائما
شكرا لك

[داعي الشوق]

صح لسانك يا بن غسلان

صح لسانك يالشاعر الرائع

صاحب الابداع المميز

قصيدة براآآقه بالجمال في الكلمة و المعنى

لله درررررك

شاعر كبير و مميز

و صح لسانك مدد

مع التحية لك و التقدير

[ناصر عبيد الهواوي]

الشاعر الكبير الغسلان لله درك على هالمعلقة
رائعة جدا جدا
بوح راقي ومعاني سامية ولا غرابة فالشاعر هو صاحب الجزلات
احسنت واطربت وامتعت
بيض الله وجهك

[منيع]

ابيات رائعه ومميزه
بارك الله فيكم
تحياتي لكم

[حي الضمير]

لاجديد عندما تبدع يافواز
شاعر بحر من الجزاله ومن الخيال الشعري العذب
ومدد صح لساااااانك

[عدنان كريزم]

فعلا قصيده ممتازه


صح لسانك ولا هنت

[صعبة المنال]

المميز الرواى

صح لسانك وفكرك

صعووووب

[الـزلـزال]

فواز الغسلان
قصيده متقنه ومميزه
من شاعر متميز ورائع في كل مايقدمة
أبدعت شاعرنا ولنا أمتعت
صح لسانك ملايين ملايين
ولك فائق تحياتي وتقديري