العزايم

[عبدالله المفضلي]

إكبري يالعزايم وإصغري يالظروف = وإركدي يالهبايب وإثبتي يالجبال
كن ما اسمع كلام وكن ما اشوف شوف = ميّت إحساس عامد واخفي الانفعال
شاعراً عرقلنّه جايرات الصدوف = معظم الوقت عاقل ما خلا من هبال
بين راساً عنيد وبين قلباً عطوف = وبين حظاً تعيس وبين ظرفاً عضال
واقفاً واتجاهل حر نار الوقوف = فوق جمر الحقيقه تحت ثلج الخيال
ليلةً عاندتني بالصعوبه تطوف = كيف انا قلت ليله ؟ بالحقيقه ليال
ماتجود الليالي في منال الشفوف = الهقاوي تبخّر دون صعب المنال
درهمن الركايب داميات الخفوف = في مضارب ( بني حاضر) وباكر تعال
شفت رف الحمام ويتبعنّه رفوف = للعشوش العتيقه معتريها الجفال
انظر الشمس تسطع ماغشاها كسوف = دونها الغيم يسبح ويتبادر سؤال
هل بقي بالسحابه شربةً بالكفوف ؟ = وهل ميل الليالي يقبل الاعتدال ؟
ماملكت الكنوز ولا تركت الحسوف = كل ماشفت بيدر دونه الحظ حال
استحي من ضيوفي لو همومي ضيوف = يقلط الهم وانحر في قدومه جمال
راحت القلب ساعه ماعلى النفس خوف = في كهوف المظامي زايلات الظلال
يقرب الضيم وانهض في يديني سيوف = وانتخي واتذكّر للمواقف رجال
ماكسبت العزايم من طموح الضعوف = لا طموحي حرام ولا التخاذل حلال

[داعي الشوق]

ماكسبت العزايم من طموح الضعـوف
،،،،،،،،،،،،،،،،،،، لا طموحي حرام ولا التخـاذل حـلال

^^^^^^^^^^

صح لسانك و اعتلا شانك يا عبدالله

عزالله انها قصيده وافيه و تشفي الجروح

أبدعت و أجزلت و امتعت

ولاهنت

و صح لسانك ملايييييين يالشاعر

[عبدالإله]

صح السانك ودام هتان فكرك نص راااائع وانت اكثر من رائع

يعجز اللسان ان ينطق أمام هذه الرائعه

تقبل كل التقدير

[عبدالرحمن الصباح]

الله الله هذا الشعر ماشاءالله عليك قصيده وافيه من اول بيت التالي بيت ابداع وتميز لاتحرمنا من ماعندك بانتظار المزيد منك اخوي تقبل ودي وتقديري واحترامي صح السانك مليار

[منيع]

مبدع ورائع
شكرا لك
تحياتي

[حرف وشعر]

نص وافى من شاعر كبير صح ربى منطوقك الجزل

[الطامي]

ع المفضلي
صح السانك ملايين
كم هي رائعة لافض فوك اخي
شكرا لك

[طوفـــان]

صح لسانك شاعرنا عبدالله المفضلي ،،،

طرح أكثر من رائع ويستحق كلمات الإشادة والإطراء

تحياتي لك أخي الفاضل

[الـزلـزال]

عبدالله المفضلي

نص رائع وجميل
من شاعر متميز ورائع في كل مايقدمه لنا
أبدعت وأمتعت شاعرنا
دمت ودام لنا حرفك الراقي
صح لسانك ملايين ملايين
ولك فائق تحياتي وتقديري

[الراقي]

صـح لسـآنك مليـآر وسلم فكرك وبوحك

قصيدة واوراق فاخرة بالمسك

تقبل ودي وآحتـرآمـي