((أهــم الأمــور))

[راشد فاروع]

السلام عليكم ورحمة الله وبركاته

اسعد الله اقواتكم بكل خير

جديدة اتمنى لها القبول


((أهــم الأمــور))

على الهون يا حلم المشاعر وشوق العين=على الهون يا مظنون راع الهوى راعه
قبل لا تروح أسألك بالله رايح وين..!=ترا النفس من تالي طواريك مرتاعه
تمهّل وروّق وإنتفاهم برفق ولين=ترا القلب لا أقفى منجرح صعب مرجاعه
لا صار الأمر شورى لا بد الأمور تزين=مقادير والشورى للأخصام نفّاعه
نعاتب بعض لو ما لنا بالفراق إيدين=تخون الظروف كفوف للورد زرّاعه
حدتنا الحظوظ العاثره والزمان الشين=والأيّام لأحلام المحبّين قطّاعه
أهم الأمور إنا ما نفقد بعض هالحين=لوإن المواصل في شريحه وسمّاعه
ترا الحب أمانه حفظها من وفا الوافين=لها شانها لو الزمن شانت أوضاعه
لو تشوفها كلمه بسيطه ومن حرفين=على القلب تنحت نحت ما تزرع ازراعه
وتراك أنت تعرف في حياتي وجودك زين=وأنا أعرف وجودي شف قلبك ومرباعه
تعاهدت أنا ويّاك والعهد مثل الدّين=ما يجرح غلانا طاري البعد بأنواعه
ويبقى غلانا سر والسر بين إثنين=ولا من درابه غيرهم ضاعة أسناعه
تبي الصدق أحسب إن الغلا مثل سور الصين=وأشوف الهبوب البارده هزّة إشراعه
أفا .. ليه ما كنا تعبنا وذقنا البين=وصبرنا على التفريق والبعد وأوجاعه
نكابر ونصبر والمواري علينا تبين=ضنى الشوق مثل الشيب ما ينفع إقناعه
مهوب أنته اللي قلت لي روح في جسمين=أنا وأنت يا أغلاهم إلى قومة الساعه
وعن هرج غيرك في سموعي عجين وطين=فدتك السموع اللي لعاذلك سماعه
مهوب انته اللي في عيونك مقامي وين=عيونك على شاني من النوم جزاعه
اذا ماانته اللي ما يداري شعوري .. مين؟=يداري شعورٍ من عنا الوقت ملتاعه
من البارح أبحر بالتفاكير بين وبين=صدوق المشاعر صدق قلبه من أطباعه
وش اللي حصل كنا سوى بالغلا مرهين=يا ملح القصيد وملهم الفكر وإبداعه
خفوقٍ عطاك الود تهدي له السكين..!=جزا انه وفا لك تشعل النار بأضلاعه..!
إذا كان قصدك تنحني هامتي مسكين=عسى الله يبيحك والرجاجيل بتّاعه
أحذّرك ما أخيّرك وحده من الثنتين=أنا رجل شامخ ما حدٍ يلوي ذراعه
مثل مالي أعدا في حياتي لي محبين=ولي هيبتي في غابة ذياب وسباعه
وإذا كان قصدك تعرف إنك من الغالين=ترا أغلا ما عندي راح لعيونك وداعه
لايلحقك شك القلب واحد ما هو قلبين=تحمل غيابك والعذل فيك ما طاعه
أحبك وأعزك وأعشقك وأستلذّك لين=ترابٍ خلقنا منه نرجع على قاعه
كبرنا وعدّينا الثلاثين خمس سنين=ولا زالت عيونك لها السمع والطاعه
على ما قضينا في بدايات عام ألفين=على الحرام أحن وأشتاق بالساعه

[عبدالرحمن الصباح]

صح السانك واعتلا شانك اخي الفاضل

[عبير الورد]

صح لساااااانك ولاهنت يعطيك الف عافية

[عبدالناصرالعالي]

صح الساانك ابدعت اخوي

[الطائر المهاجر]

حجز وانتظار

[منيع]

كل الروعه والابداع
تحياتي لكم

[حوريه]

ابداع وامتاع
صح لسانك
ودام احساسك

[سامي احمد الفيفي]

صح لسانك..نص جميل جدا..

أعجبتني هذه الأبيات الثلاثة لكن خارج القصيدة:

إذا كـان قـصـدك تنحـنـي هامـتـي مسكـيـن = عـســى الله يبـيـحـك والـرجـاجـيـل بـتّـاعــه
أحــذّرك مــا أخـيّـرك وحـــده مـــن الثنـتـيـن = أنــا رجــل شـامـخ مــا حــدٍ يـلــوي ذراعـــه
مثـل مالـي أعـدا فـي حياتـي لــي محبـيـن = ولــي هيبـتـي فــي غـابـة ذيــاب وسبـاعـه

[منصور العبدالله]

ترا الحب أمانه حفظها مـن وفـا الوافيـن
لها شانها لـو الزمـن شانـت أوضاعـه
لو تشوفها كلمه بسيطـه ومـن حرفيـن
على القلب تنحت نحت ما تـزرع ازراعـه
وتراك أنت تعرف في حياتي وجـودك زيـن
وأنا أعرف وجودي شف قلبـك ومرباعـه



صباح الشعر

الشاعر راشد

الجزل مايجيب الا الجزل

صح لسانك

تحياتى

[داعي الشوق]

صح لساانك يا بن فاروع

و الحمدلله على السلامه

قصيدة جزلة و جدا جميلة

و لاهنت

صح لسانك مع التحية لك

**********