صار الادب شغلة عقـولٍ بليـده !!

[سـعـد الحويماني]

السلام عليكم ورحمة الله..

متواضعه وجهتها للشاعر نايف الثبيتي في احد المنتديات

اتمنى ان تنال استحسانكم

ياسيداتي سادتي يامسـا الخيـر=هاذي تراها اليوم فرصه سعيـده
يروح قافـي للرجـال المناعيـر=واخص لي شاعر شجـاعٍ وليـده
نايف كعام الخصم زبن المخاسيـر=الشاعر اللـي مايقـول الزهيـده
ابا انشده وابي للاوضاع تفسير=وابي جوابه وسط (جملـه مفيـده )
عينت وين كليب وذيـاب والزيـر؟؟=وين الرجال اللي تصوغ الفريـده ؟!
مواهب ٍ من دون درسٍ و تحضير=اهل المعانـي النـادره والاكيـده
راحو وصار الوضع ياصاحبي ((غير))=وصار الادب شغلة عقـولٍ بليـده !!
فعلٍ مفاعل فاعلاتن وش تصيـر؟=في هالزمن صارت بحور النشيده
ومبدع جزل معها احترامٍ وتقديـر=هاذي ردود الناس لايـة قصيـده
لو كان كسر ابيوتها فيـه تكريـر!!=واليا قريت القاف صعبـه تعيـده
تبحث وتتعب مالقيـت المعاذيـر=والمشكله محطوط رابـط جريـده !
يعني قبيلك صار ضمن المشاهيـر=اليـا نقدتـه وش تبـا تستفيـده!!!
اما هجاك بقـاف قطـه وتزويـر=ولا اتهمك بحقـد ضـده تزيـده
واقع ويصعب لا انتقدت الغناديـر=تقوم ضدك حـرب جـدا شديـده
الغالبيه صـاروا الهـن جماهيـر=كلـن يدافـع والنوايـا مكـيـده
وجهتها لك يالثبيتي علـى خيـر=فالمنتدى تو القصيـده جديـده

[سـعـد الحويماني]

ياذيب ياللي نسمع عواك بالنير=هيضتني بالصوت ليتك تعيده
ياليت الي ياذيب جنحان واطير=واقرب دير شاعر كبير رصيده
شاعر فرض نفسه بحكمه وتقدير=ابو حسن ياسعد منهو عضيده
بعض الرجال بطلته مقدم الخير=وان غاب يحسب في غيابه فقيده
المخطيه وان شافها وقف السير=حتى تعدل والنوايا حميده
لوكان ابه ناسٍ على الطار والزير=ترقص على لحن الطبول العتيده
تدرس نحو ماردت الزمل والعير=وتدرٍسه حتى وهي ماتجيده
كله لجل من ينقشن المناكير=يقرب ولو هي معه قشرا عنيده
يلمع الهافي وينفخ على الكير=غاوي دليل الله بغيه يزيده
وحنا ليا منا وردنا على البير=تاصل دلانا للعدود البعيده
نشرب ونسقي ضاميات المغاتير=ونصدر اللي ملتوي فيه قيده
وانته سعد قود النشاما المغاوير=لا تلتفت للي عيونه لسيده
هذا تراث اجداد حكمه وتعبير=ماهو لمن هوجس وغنا يريده
نتعب على حفظه ونحتاط ونغير=وعلاقةٍ تبقى مع اهله وطيده
ولو الزمن هبت هبوبه بتغيير=نبقى حماته بالظروف الشديده
جاتك علومي ياسعد شبه تصوير=والله عليم بقصد نية عبيده

[ابومياس]

سعد الحويماني

قصيدة وردها

هنا وهناك جزالة لابعد الحدود

نص يحكي عن واقع وهو واقع يا اخي سعد

فلا تشكي فالشكوى لن تغير شي

ليس بالشعر فقط

كم من شخص لايسوى قيد انمله

طبل له حتى اصبح كالجبل

لكن اخي سعد ( البالون قابل للنفجار بدون ضرر مهما بلغ حجمة سيعود الى حجمة الطبيعي او اصغر من ذلك
ولن ينتفخ مرة ثانية )

صح لسانك ودام حرفك

دمت بخير

[الطائر المهاجر]

صح لسانك ولسان نايف
صوت وصدى جزلين من شاعرين مبدعين
اما هالبيتين اتحفظ عليها ،
راحو وصار الوضع ياصاحبي ((غير))=وصار الادب شغلة عقـولٍ بليـده !!
فعلٍ مفاعـل فاعلاتـن وش تصيـر؟=في هالزمن صارت بحـور النشيـده

فعدم المعرفة بالشئ لايلغيه ..
ومن اراد التعرف على اصول الشعر الشعبي في شبه الجزيرة العربيه
يدخل قسم حوار ودراسات ليطلع على بعض ما كتبه عنه ويبحث في قوقل
ليطلع على المزيد .
الأبحاث والدراسات

لاهنت يابو حسن
مع أطيب تحياتي

مواهب ٍ مـن دون درسٍ و تحضيـر
اهـل المعانـي النـادره والاكـيـده
راحو وصار الوضع ياصاحبي ((غير))
وصار الادب شغلة عقـولٍ بليـده !!
فعلٍ مفاعـل فاعلاتـن وش تصيـر؟
في هالزمن صارت بحـور النشيـده

****************************** **********

بقدر روعة كلماتك

و رقة معانيها

ارسل من الزهور اروع ما فيها

[مبروك بن ماضي]

الاخ الفاضل / سـعـد الحويماني
صوت وصدى رائعين لشاعرين قديرين
صح لسانك ولسان الشاعر نايف الثبيتي
سوف أصفق لكمل بحراره كلما مررت من هنا
تقبل تحياتي واحترامي كما هي للشاعر الثبيتي
أخوكم / بن ماضي

كفو والله يالغالي

نص جميل عذب

صح لسانك ودام حرفك

دمت بخير يالغالي

قصيدة جميلة

تضم معانى من القلب للقلب


تسلم اخى لهذا البوح


اتمنى الا تحرمنا من ابداعاتك

[متسامح]

الله يعطيك العافيه اخوي

جزله ورائعه من شاعر مبدع

دمت و لاهنت

[أم ريما]

صح لسانك

قصيده رائعه

الله يعطيك العافيه