مرثية الأسهم منقوووووووووول

نجم الإبداع · 29-04-2006, 08:09 PM

با بو محمـّد شاب راسي قلت لي شيبك وقار=والشيب في هذا الزمن ياحسين ما حد وقـّره
شيبي ترى ما هو كُبر سنـِّي ولا غربة ديار=في كل يوم يشيب في راسي ثمانين شْـعـره
كان المؤشـِّر فوق عشرين الف نقطه باخضرار=والناس باعت واشترت ونـْـفوسهم مستبشره
”مسفر “شرى سابك و”صالح“ رأس ماله في ثمار=و”سعيد“ في طيبه و”ابو تركي“ في المتطوّره
وانا في الباحه , يقولوا ما يخيب من استشار=واللي شرى في صدق لاجل ارباحها المتكرره
والناس كبـّو البيع وعروض التجاره والعقار=وتوجّهوا للأسهم..الارباح فيها مبهره
فلان باع الارض والفيللا وجيب الفيكس آر=وفلان باع المزرعه وفلان قبـّل متجره
وفلان بايع مسكن اولاده وساكن بالأجار=والبعض خذ تسهيل بنكي او قروض ميسـّره
وفلان بيته للكرم مفتوح به شبـّه ونار=باع الكرم والعود والدّلـّه وباع المبخره
حمـّى تداول سوق الاسهم شملت ذات الخمار=باعت حزام العرس والرشرش وبعض الأسوره
حتـّى الغشيم بسوق الاسهم حط روحه مستشار=يوصي ”عبيد“ على اللجين و”زيد“ منها حذ ّره
والبعض يكتب في المساهم باسم ثاني مستعار=بيد المضارب للإشاعه يأمره ويسيـّره
ثم انحنى رأس المؤشـّـر وابتدأ بالإنحدار=واحمـرّت الشاشه وانا عيني بها متسمّـره
ايش السبب بالله يا ناس اخبروني ويش صار=والناس في لجّه وصجّه كلّها مستفسره
يقلون جني ارباح .. بل تصحيح .. بل هذا انهيار=يالله رحماك بعبادك يا عظيم المغفره
اصبح حديث الناس في الشارع وفي كل المقار=في السوق والمسجد وفي المنزل وعند المقبره
وضعت يا جمـّاز من مبدا الشفافيّه شعار=واموالنا تـُنهب تقول الوضع تحت السيطره !
تقدر تقول اللي يدير السوق من خلف الستار؟=تقدر تقول اشْـلون هذا تفضحه واشْـلون هذا تستره؟
نبي سبب مقنع .. سبب تافه.. ولوحتـّى إعتذار=تنام عينك لكن المظلوم ليله يسهره
تقول دام انك دخلت السوق ما عاد لك خيار=قرارنا ساري سواءً تقبله والا ذ ََرَه !
يحاكموا صدّام عرّض بعض شعبه للدّمار=ما حاكموا جمـّاز والشعب السعودي فـقــّره
واحوالنا يُرثى لها حين انجلى عنـّا الغبار=جروحنا متفاوته واشلاءنا مـُـتـنـثــّره
هذا قضى نحبه من الصدمه وهذا باحتضار =والبعض يرقد بالعنايه حالته متدهوره
وهذا فقد عقله وهذا قد نزل قبله شهار=وهذا شلل نصفي وهذا خطوته متعثــّره
من للثكالى والارامل وايضا الايتام الصغار=الوضع مؤسف والزمان اظلم سنينه واشْهـُره
ما عاد ليلي ليل مثل الناس ونـْهاري نهار=اخلاقنا متغيـّره واعصابنا متوتره
الغوث جانا والفرج من عند صنـّاع القرار=بالتجزأه وايضا التداول للعماله الموسره!
هضاب نجد تمخـّظت بعد العنا تولد بفار=لاجنبي يكسب وحنـّا ما بقي شي نخسره!
واحد على الشاشه طلع مادري أسد والا حمار=اوقات تسمع له نهيق واحيان تسمع زمجره
يصنـّف السوق بهواه..هذا قرع ..هذا خيار=يقول ما لا يفعله واكثر علينا الثرثره
وهو سبب فيما حدث, صـرّف علينا باقتدار=واللي نوى التصريف من يوقف بدربه ينحره
هذا خلاصة ما حصل نقلتها لك باختصار=شهرٍ مضى قد كان الاسوأ في حياتي واخطره
ليتك تشوف ابو علي ثلثين ماله كيف طار=لكن ديني ما خسرته واحمد الله واشكره

منقول
لااعرف اسم الشاعر

تحياتي

أم ريما · 29-04-2006, 11:22 PM

مشكور اخوي فلاح

والله من جد يعين كل من خسسسسسسسر

ويارب يرجع الأسهم زي ما كانت

تحياتي لك

ابو أنس · 29-04-2006, 11:45 PM

احسن الله عزاءك وجبر مصيبتك وخلف عليك وعلى كل متضرر بخير الخلف
وببقاء الدين والعقل
لك تحيتي وشكري

يزيد النمي · 30-04-2006, 01:35 PM

ليتك تشوف ابو علي ثلثيـن مالـه كيـف طـار لكن دينـي مـا خسرتـه واحمـد الله واشكـره

زين اللي ماراح الدين بعد
الى بقى الدين والعقل والصحة كلش يهون
تسلم يافلاح